| English | Mushuau Innu-Aimun |
Anitshenat ka tshimanakaniht tshe atushkatakau tapueun‑nanatu-tshissenitamunnu, tshika minu-tshitapatamuat kie tshika mashinataimuat ka ishi-tutakaniti, ka ishi-uauitaminiti ka ishpaniti nete utinniunit kie mashten ka ishi-matenitak ka ishi‑tutakanit nete auassat ka utinakaniht kie ma ka kanuenimakanuht Katshishe-utshimau-atusseniti. Nasht nika minu-tshitapatenan kie nika minu-nanatu-tshissenitenan nete etananut kie e itinanut, nete ka utshipanit shuniau ka ishi-matenitakuak, innu aitunit, ka mamishati ka ut pimipaniti atusseuna, kie ka pet ishi-nametananut eka ka minupanikut innu kie ka uesham mitshetit auassat ka utinikuht, nete ka ishi-pimipanitakanit tshishe-utshimau atusseuennu, eku tshe shutshiteieshkatunanut tshe ishi-tutakanit tshetshi aianishkat ishi-minupanitakanit ne Ka-tshishe-utshimau-atusset utatusseunuau.
Anitshenat tshe atushkatahk tapueun‑nanatu‑tshissenitamunnu:
- Tshika tshitapatakanu ka tutakanit tshe ishi‑nashatakanit ka atushkatet Ka-tshishe-utshimau‑atusseun nete nanatu-tshissenitamunit, minuat kau tshetshi minu-tshitapatakanit kie ka ishi‑nanatu-tshissenitakanit eka ka minupanit nete ut:
- Ka ishi-nametat nete utat Katshishe-utshimau-atusset auassa ka utinat kie ka kanuenimat nete ut innua
- Tshekuannu ka ut tat innu nete Katshishe-utshimau-atusseniti
- Tshetshi tutakanit tshekuan kie ka tshissenitakuak tshe eka minupanit ka ishi-tutakanit tshekuan tshetshi tapuetakanit ka ishi-takuak uauitshitun, kie tshetshi eka tananut kie ma e utinakanit auass nete ka tat uikanisha kie ma innu‑assit, kie eka ka tapuetuakanit tshetshi e itat nete ka ishi-inniut kie innu-assit mekuat e utinakanit kie e kanuenimakanit
- Uauitshitun, ka tutuakanit auen ka uauitak kie mashten eshi-mishkakanit tshekuannu innu ka tat nete eka ka minupanitakanit Ka-tshishe-utshimau-atusseunnu, mamu uikanishimauat kie utaumauat mak ukaumauat
- Tshe ishi-uauetashutakanit ka-nanatu-tshissenimakaniht papeikᵘ ka nipiht innu-auassat, ussinitshishuat kie ishkuessat, anitshenat:
- eka ka minu-tutuakaniht nete ka utinakaniht kie ka kanuenimakaniht;
- Eshkᵘ eka 25 tatupipunueshiht ka nipiht kie ma ka nipiht ushkau-pishimua 30, 2007 pipunnu
- Utaumauat kie ukaumauat kie ma auen ka uinakanit tshetshi tat eka taniti uikanishimuaua, kie kutak uikanishimuau ka uinakanit tshetshi tat nete e taniti eshkᵘ e takuanit ka ishi-pimipanitakanit ka-tshishe-utshimau-atusseunnu ka ut nipiniti; kie
- Ka natuenitakanit tshetshi nanatu‑tshissenitakanit nipun
- E tutakakaniti tapuetamuna tshika mamushtakanua ka ishi-mishkakanit Ka‑nanatu-tshissenitakanit tapueun e uauitakakanit ka ishpanit Ka-tshishe-utshimau-atusseun, ka ishi-tshishkutamakuiat tshekuan ute atusseun, (tshekuan ishpanipan, tshekuan ishi‑matenitakuanipan, tshekuan mishkutshipanipan, tshekuan minupanipan kie tshekuan eka minupanit), kie tshetshi takuak tshe ishi‑minupanitakanit nete aianishkat.
TSHE ISHI-PIMIPANIT UAUITAMATUN
Nete Ka-nanatu‑tshissenitakanit tapueun tapuetatishunanu innu kie innu-assit nekatshiun uetshipanit ka aianishkatumakak nishtuenitamun nete ka utshipanit tshetshi ishinakuak e uakatakanit eshi-inniut kie ka akaneshau pimipanitakani tshekuannu.
Ume Kananatu-tshissenitakanit tapueun tshika ishi-pimipanitakanu e nashatakanit tshe ishi-tutakanit tshekuan tshetshi eka akuaitunanut. Eukuan tshe ishi-atushkatet kassinu tshe aitinanut kie tshe natutuakaniht auenitshenat patshitinakau utaimunuau nishtenitamunnu uauitakau.
Tshika tutakanu tshetshi peikutakanit kie tshe ishi‑uauitshiaushinanut nete ut Touchstones of Hope tshetshi atushkatet tshe ishi-mishkutinakanit eka ka minupanit tshekuan, tshetshi mamu uitshitunanut e nanatu-mishkakanit minupanitun, kie tshe ishi-tutakanit tshekuan tshetshi petuakaniht innu-aitunit, innu-aimunit kie eshi-inniunanut nete innit.
- Nete tshetshi peikutakanit minupanitun eitinanut:
- nasht e tapuanut eiminaniti,
- nasht e uitakanit ka ishi-tapuetatishunanut,
- kau e petakanit ka ishipanit tshekuan kie
- kie tshetshi minupanikue tshekuan ane ka ui nishi-tutakani
- Kie tshe ishi-nashatakanit uauitamatun:
- e peikᵘ tipenamitishun.
- ka ishi-inniut kie utaimun auen,
- e peikutakanit tapuetatishun,
- e pitakatakanit uauitshitun kie
- tshetshi eka takuak piuenimitun.