English

Mushuau Innu-Aimun

Tan ishipish tshitshipananuipan?

Shiship-pishimᵘ 29, 2022 pipun

Tshekuan tshe tutakanit ?

Tshika minu‑tshitapatakanu, nanatu‑tshissenitakanu kie tshe ishi‑pimipanitakanit innuat eka ka minupanikuht Katshishe-utshimau-atusseniti. Tshika natutuakanuht auenitshenat ka ishi‑matenitahk kie ka ishi-tutuakaniht nete Katshishe-utshimau-atusseniti eshi‑pimipaniti ka kanuenimakaniht: Tshika tshishkutamatishuat ka atushkatakau auenitshe ka nanatu-tshissenimakaniti Katshishe-utshimau-atusseniti ka utineniti auassa, ka aitu-tutuakaniti, ka ishpaniti utinniunit kie tan ishpanipan nete mashten innu ka pimipaniakanit, auassat ka utinakuht Katshishe-utshimau-atusseniti kie

• • Innu-assit tshika uauitakanu ne nanatu‑tshissenitamun atusseun;
  • Tipan tshika natshishkuakanuht uikanishimuauat kie kutakat auenitshenat, kie kamakunakaniht;
  • auenitshenat tshe aimiakaniht;  kie
  • e uetashinataitshenanuti, nikamuna e tutakaniti, e pitepanitishunanuti, e mashinaitshanuti, kie kutaka tshekuana

Nipun ka nanatu-tshissenitakanit: Tshika nanatu-tshissenimakanuht passe auassat kie ussinitshishuat ka kanuenimakaniht kie ma ka unitak itinniunuau kie ka ishi-tutuakaniht nete e kanuenimakaniht kie ma ka utinakaniht

• • Uikanishimauat kie ma uikanishimau ka uinakaniti nete auassa tshetshi uinuau uetshit aimiakanit uiesh aitiniti auassa, tshika natuenitamuakanuht ka shakassinitakanit mashinaikannu tshetshi nanatu-tshissenitakanit ka ishpanit tshekuannu nete ka kanuenimakaniti. Kie tshetshi mashinatautishut tshetshi uitshiaushiht nanatu-tshissenitakaniti tshekuannu, eku utinakaniti ne mashinaikan ka shakassinitakanit kaimisht mak nutim tshekuannu tshika tshishikashunanunu.  Shash tshipa tshi shakassinitakanu mashinaikan upau-pishimᵘ 1, 2022 nuash uashtessiu-pishimᵘ 31, 2022 pipun
  • Ne uet nanatu-tshissenitakanit tshekuan, tshetshi nishtutatakanit tshekuan ishpanipan kie tshetshi tutakanit tshekuan tshetshi eka minuat ishinakuak nete aianishkat.
  • Nete ka pimipanitakanit tapueun ka nanatu‑tshissenitakanit, apu tshika ut uauetashutakanit atamenitamun, kie ma etamenimakanit auen, kie ma tshetshi ut mishkakanit  e pikunakanit tipenitamun matshi‑tutamunit  kie ma tipenitamun takuaimatsheun tshetshi ut shuniat kaniupanit.

Nete ka ut tshishkutamatishunanut tshekuannu ka ishi-tshissenitahk tshishennuat, auenitshenat ka mishta-tshissenitahk kie ka mishta‑tshishkutamashunanuti: Nete ka ut pimipanitakanit tapueun ka nanatu-tshissenitakanit, tshika tshishkutamuakanut tshetshi minu-tshissenitak ueshkat ka aitinanunit, kie anu uet minuanit tshishennuat eshi‑tshissenitakau, ka tshissenitakau tshekannu auenitshenat, ka mishta-tshissenitak tshekuannu ka mishta-tshishkutamuakanit kie ma ka mishta-tshikutamashunanuti auenitshenat ka atusset, miam mate katshishe-utshimau-atusseshiht, kamakunueshiht, auassa mak ussinitshishua ka atushkuat, minu-inniunnu ka atushakatak, kie ka uauitshiat auenitshenat ka mitunenitshikan akushiniti , kie kutakat auenitshenat nete tshe tananut, tshe natutuakaniht aimitau kie ka ishi-nanatu-tshissenitakanit tshekuan.

Tshekuan tshe ishi-pimipanit

Tshishe-utshimau utipenitamuna ekute ka ut tshitshipanitakanit tapueun ka nanatu-tshissenitakanit, kie eukuan tshe uauitakanit auen, tshekuan, tanite, tan ishpish kie tanite uetshi ishpanit / tanite uetshi ishinakuak / tanite uetshi eshi-pimipanit ume nanatu-tshissenitamun tapueun ka atushkatet.

Auenitshenat

• Judge James Igloliorte (shashish kaimit ute Akamassissit mak Napatuau),
• Anastasia Qupee (shashish ka utshimashkueut anite Innu Nation), kie
• Mike Devine (shashish ka mishta-tshishkutamatshet ka tshishe-utshimau-atusseunnu)

Tshekuan tshe tutakanit nete nanatu-tshissenitakaniti tapueuen ?

• Tshe ishi-tutakanit tshekuan kie eshi-atushkateti ka ishi-tapuetatishunanut, e nanatu-tshissenitakanit, eshi-mishkakanit, minuat kau e minu-tshitapatakanit ka ishi-nanatu-tshissenitakanit nete ka ut tshitshipanit eka ka minupanit tshekuan:
  • Shashish ka pet kanuenimakaniht auassat ka ishi-matenitahk innu
  • Tshekuana ka ut aitat innu nete auassa ka kanuenimakaniti
  • Tshetshi tutakanit tshekuan kie tshekuan eka ka ishi-minupanit, tshetshi tutakanit e uitshiakanit auen kie tshetshi eka ka uitshiaushiht auen kie/ kie ma e utinakaniti utauassima uikanishimuau, kie ma nete innu-assit eshkᵘ ka-ishi-inniut kie ka aitit utinniunnit eshkᵘ ka tat nete innu-assit mekuat ka utinakanit
  • Ka ishi-tutuakanit eka minuanit, ka ishi matenitak eka minu-tutuakanit, kie eshpanit innu ka tat nete ka ishi-tutakanit tshekuannu tshe atushkatet, kie e taniti uikanishimuaua
• Tshe ishi-uauetashuteti nanatu-tshissenitamuna auassat kie ussinitshishuat ka nipiht:
  • Ka ishi-tutuakaniht mekuat ka kanuenimakaniht kie ma ka utinakaniht
  • Eshkᵘ eka 25 tatupipunueshiht ka nipiht kie ma ka nipiht ushkau-pishimua 30, 2007 pipunnu;
  • Uikanishimauat, kie ma peikᵘ uikanishimau e takuaimuat uikanisha, kie ma auen ka uinakanit tshetshi tat nete ueshkat ka ishi-pimipanit tshishe-utshimau-atusseunnu ka ut nipiniti auassa; kie
  • Tapuetatun tshetshi tshitshipanit e nanatu-tshissenitakanit tshekuan
• Eshi tapuetishunanut tshe ishi-tutakakanit tshekuan: Tshika mamushtakanua uauitamuna, tan ishpanipan tan eshi-matenitakuanipan, tshekuan miashkutshipanit, tshekuan minupanipan kie tshekuan eka minupanit, kie tshetshi tutakanit tshipa ishi-minupanu nete aianishkat.

Tshekuannu uet ui shitshimunanut tshetshi nanatu-tshissenitakanit tapueun ?

Anitshenat ka tshimanakaniht nete ut tshishe utshimaua ui tutamuht tshetshi takunit innuat tshetshi uauitakau eshi-tshissenitahk shutshiteieshimunnu kie shitshimueunnu.  Mashten tshipaikaniti ume ka nanatu-tshissenitakanit tapueuen, tshika minu-tshitapatamuat anitshenat ka tshimanikuht  tshishe-utshimaua, nenu ka ishpish petahk etatshimushtuakaniht kie eshi-tshishkutamakuht auennua. Eku tshe tutahk mashinaikannu tshipa ishi‑uitshiakanuht auassat , e shutshiteieshkuakaniht, tshetshi minuenamuht, kie tshetshi ishinniut miam innu ka ishi-inniut.

Tanite tshe natshishkatunanut ?

Anite innu-assit: Nasht eshpish tshi tutakanit tshetshi petuakaniht innuat aimiakanitau, e uaiepananunit kie nete Sheshatshit mak Natuashish tshika tananu. Tshika tutakanu tshetshi natutuakaniht auenitshenat nete ka aitat innu-assit, tshika uauitamuakanuht uauitamatunnu kie nete tshe natshishkuakanit mamuitunanuti.

• Ashu-uitamatun: Innu ka ashu-uitamatsheshiht tshika tauht nete natshishkatunanuniti.
• Natshishkatunnu tshe aiatinak nete innu-assit: Anitshenat ka tshimanakaniht tshishe-utshimat tshetshi pimipanitat tapueun‑nanatu-tshissenitamunnu, shash aieshkuenamuht tshetshi tat auen tshe aiatinahk natshikatunnu nete Sheshatshit mak Natuashish.
• Uauitshitun tshe ishi-takuak: tshika takuan uauitshitun nete tapueun‑nanatu-tshissenitamun atushkateti mamuitunanuti.

Tan tshe ishpish tshitshipananut kie punanut ? 

• Nete 2023 pipun tshitapatakanu tshetshi tshitshipananut: Uipat 2023 pipun tshika tshitshipananu, e tshissituakaniht auenitshenat kie ekute tshe shenikanit tshe atushkatet tapueun‑nanatu-tshissenitamun.
• Uauitamatun tshipa tshishtakanu uashtessiu-pishimᵘ 31, 2023 pipun (kie anitshenat ka atushkatakau nenu tapueun-nanatu-tshissenitamunnu tshika tauat nete innu-assit tshe uauitahk ka ishi-mishkakau ka ishi-nanatu-tshissenitakanit tapueun.)

Tan nipa ishi-tuten tshetshi kie nin aimian ?

• Tshe uauitamin ka pet ishpanin kie tshin
  • Eku ui uauitamini ka ishpanin tshitinniunit nete Kananatu-tshissenitakanit tapueun, tshika minikun tshetshi mashinatautishuin tshetshi eka unuipanitakanit tshitipatshimun tshetshi tain nete kauauiepananut kie ma mamu e uauiepananut nete takuatshiniti. Tshika uitakanu tshe ishpish tshitshipananut.
• Auenitshenat tshe minakaniht tshetshi aimiht
  • Anitshenat kaitusseshiht ka peiku-pimipanitishuht kie ma auen tshetshi minakanit tshetshi aimit, mashinaikana ka shakassinitakaniti tshika unuipanitakanua mashten e atushkanut shetan-pishimᵘ. (Eukuanat anitshenat auenitshenat tshe matenitahk ka ishi-mishkakanit tshekuannu nete Ka‑nanatu‑tshissenitakanit tapueunnu. Tshika minunakuan eshi-atushkatet e‑nanatu-tshissenitakanit tapueun.)  Akamassissit mak Napuatuau tshishe-utshimau kie Innu-kapeiku-pimipanitishuht (Innu Nation, Sheshatshit mak Natuashish innu-utshimauat) tshika minakanit tshetshi aimiht. Kutakuat kapeiku-pimipanitishuht passe eshi-pimipananut tshika minakanuht tshetshi uauitahk kie uinuau etenitahk.
• Nipuna ka nanatu-tshissenitakaniti
  • Eku ui itashueini tshetshi nanatu-tshissenimakanit ka unit tshikanish, tshika shakassinitan mashinaikan. Nete kaitusseu-katshitapatakanit tshipa tshi unuipanitan ne mashinaikan. [link to form].  Eku tshe pitakatain ushkau pishimᵘ 30, 2022 pipun. Tapuetakaniti tshimashinaikan tshetshi nanatu-tshissenimakanit tshikanish ka natuenitamut, nutim tshika tshishikashunanut  kie kaimisht tshe uauitshishk.

Tan tshe ishi-atushkatet tapueun-nanatu-tshissenitamun ?

• Kaimishiht tshika mamunamuat uauitamuna kie eshi-mishkakanit tapueun tshetshi mashinataikau kie uauitakau tshipa ishi-minupanitakanu ka ishi-nanatu-tshissenitakanit tapueun.
• Tshetshi peikutakanit minupanitun:  Nete Ka-nanatu-tshissenitakanit tapueun tshika tutakanu tshetshi peikutakanit kie tshe ishi-uauitshiaushinanut nete ut Touchstones of Hope tshetshi atushkatet tshe ishi-mishkutinakanit eka ka minupanit tshekuan, tshetshi mamu uitshitunanut e nanatu-mishkakanit minupanitun kie tshe ishi‑tutakanit tshekuan, tshetshi petuakaniht innu‑aitunit, innu‑aimunit kie eshi-inniunanut nete innit.
• Apu tshika ut itamenimakanit auen kie apu tshika ut pimipaniakanit nete kaueueshtakanit
• E natutuakaniht auenitshenat: Apu tshika ut animenitakutakanit tshe ishi-pimipananut nete natutuakanitau auenitshenat
  • Tshika minakanuat auenitshenat tshetshi eka unuipanitakanit utipatshimunuau kie kutakat tshika minakanuat mukᵘ uinuau etenitahk tshipa ishi-minupanut eimitau
  • Ka ishpaniht nete Katshishe-utshimau-atusseniti ka ishi-pimipanit tshipa tshi ishi-uauitamut nete
    • e uetashinataitshenanunit;
    • e tipatshimut;
    • e minuepitakanit kie ma e nikamunanunit;
    • e pitepanitishunanuniti kaishetshimakaniti;
    • kutaka kaishetshikamakaniti;
    • e pitepanitishunanuti e aiminanut;
    • e mashinaitshenanunit;
    • tshissatmun-mashinaikanissa; kie
    • nete kaitusseu-katshitapatakanit.
  • Tshipa tshi apashtakanu kassinu kie ma passe tshekuana :
    • Nete ka natutakanit
    • Kaimiakaniht kie kananatu-tshissenitakanit
    • Nanatu-tshissenitamuna (kie nipun nanatu-tshissenitamuna)
    • ka nanatuapatakanit tshekuan e mashinataikanit
    • e mashinataikaniti tipatshimuna
• E shitshimakanit auen: Nete tapueun ka-nanatu-tshissenitakanit tshetshi shitshimakanit auen tshetshi minuet mashinaikana kie ma tshetshi tshiuenak aimunnu eshi-tshissenitak.